Delegacioni i Kosovës në udhëtim studimor në Hungari të përmirësojë qasjen e spitaleve promovuese të shëndetit për SJN
Një delegacion nga Kosova ndodhet aktualisht në një udhëtim studimor një-javor në Hungari për të përmirësuar shërbimet e kujdesit shëndetësor për sëmundjet jo-ngjitëse (SJN) në vend. E organizuar në kuadër të Rrjetit të Spitaleve Promovuese të Shëndetit, vizita mbështetet nga OptiMedis dhe Bethesda Children's Hospital. Delegacioni përfshin përfaqësues nga Ministria e Shëndetësisë, Instituti Kombëtar i Shëndetit Publik, spitalet e përgjithshme dhe institucionet e kujdesit parësor shëndetësor.
Gjatë vizitës studimore, Dr. György János Velkey, Drejtor i Përgjithshëm i Spitalit të Fëmijëve Bethesda dhe Dr. Zsuzsa Rákosy-Vokó, Udhëheqëse e Promovimit Shëndetësor, po u ofrojnë anëtarëve të delegacionit njohuri mbi praktikat e promovimit shëndetësor në spitalin kombëtar në Hungari dhe i ndihmojnë ata që të zhvillojnë shkathtësi praktike dhe strategji për zbatimin e nismave të ngjashme në Kosovë.
Fekrije Hasani, Eksperte e Lartë Shëndetësore për projektin IHS, i cili e organizon vizitën, theksoi rëndësinë e udhëtimit, duke thënë: “Duke studiuar strategjitë e Hungarisë për spitalet promovuese të shëndetit, ne po fitojmë njohuri të vlefshme për integrimin e kujdesit parandalues dhe edukimit shëndetësor në Praktikat spitalore të Kosovës. Ky shkëmbim do të përmirësojë cilësinë e kujdesit për pacientët, veçanërisht ata me sëmundje jo-ngjitëse, duke fuqizuar profesionistët e kujdesit shëndetësor në Kosovë për të zbatuar qasje të qëndrueshme, me pacientin në qendër”.
Fokusi i projektit IHS është në përmirësimin e proceseve klinike, menaxheriale dhe qeverisëse, me vëmendje të veçantë në Spitalet e Përgjithshme të Pejës dhe të Gjakovës. Vizita në Hungari pritet të mbështesë zhvillimin e strategjive praktike që do të çojnë në një kujdes shëndetësor më të qëndrueshëm, me pacientin në qendër në Kosovë, dhe do të nxisin një bashkëpunim më të madh ndërmjet institucioneve shëndetësore në Hungari dhe në Kosovë, duke siguruar zhvillim afatgjatë në sistemin e kujdesit shëndetësor të Kosovës.
Kjo vizitë është pjesë e projektit të Shërbimeve Shëndetësore të Integruara (IHS), një iniciativë e përbashkët e Agjencisë Zvicerane për Zhvillim dhe Bashkëpunim (SDC) dhe Ministrisë së Shëndetësisë së Kosovës (MSH), e organizuar nga Instituti Zviceran për Sëmundje Tropikale dhe Shëndet Publik (Swiss TPH).