Pesë spitale të përgjithshme përfundojnë vetëvlerësimin
Gjatë dy javëve të fundit të dhjetorit 2025, Spitalet e Përgjithshme të Mitrovicës, Ferizajt, Gjilanit, Vushtrrisë dhe Prizrenit përfunduan vetëvlerësimin e strukturuar bazuar në standardet ndërkombëtarisht të njohura të Spitaleve Promovuese të Shëndetit (HPH) 2020. Ky proces shënon hap të ri drejt forcimit të kujdesit të përqendruar te pacienti dhe shërbimeve promovuese të shëndetit në Kosovë.
Vlerësimi u realizua në bashkëpunim me Shërbimin Spitalor dhe Klinik Universitar të Kosovës, me mbështetjen e Projektit Shërbimet Shëndetësore të Integruara (IHS). Projekti IHS inicioi procesin e vetëvlerësimit të spitaleve të përgjithshme në përputhje me Standardet 2020 për Spitalet dhe Shërbimet Promovuese të Shëndetit, bazuar në përvojën e fituar nga zbatimi i këtij procesi në Spitalet e Përgjithshme të Pejës dhe Gjakovës, të cilat që nga marsi 2024 janë anëtare të Rrjetit Ndërkombëtar të Spitaleve dhe Shërbimeve Promovuese të Shëndetit (HPH).
Ekipet multidisiplinare spitalore shqyrtuan politikat, strukturat dhe praktikat e përditshme duke përdorur mjetet e vetëvlerësimit HPH 2020, duke identifikuar pikat e forta, mangësitë dhe fushat prioritare për përmirësim në promovimin e shëndetit dhe parandalimin sekondar, veçanërisht për pacientët me sëmundje kronike jongjitëse. Procesi u udhëhoq nga tre facilitatorë lokalë dhe u mbështet në përvojën e mëparshme të spitaleve të përgjithshme në Pejë dhe Gjakovë.
Rezultatet do të përmblidhen në pesë raporte specifike për secilin spital dhe në një raport përmbledhës ndërspitalor, si bazë e qëndrueshme evidence për planifikimin në të ardhmen, për përmirësim të cilësisë dhe dialog të politikave në nivel vendor për spitalet promovuese të shëndetit në Kosovë.