Konsultime për shtegtimin e pacientëve në Pejë dhe Gjakovë

Më 8 dhe 9 korrik 2026, Projekti për Shërbime Shëndetësore të Integruara (IHS), së bashku me konsulentin ndërkombëtar Dr. Farhad Riahi, realizuan konsultime në terren në Pejë dhe Gjakovë për të vlerësuar shtigjet e pacientëve për sëmundjet kronike jongjitëse.

Vizitat mblodhën së bashku stafin menaxhues, klinik dhe administrativ nga Spitalet e Përgjithshme dhe Qendrat Kryesore të Mjekësisë Familjare (QKMF) në të dy komunat. Përmes vizitave në objektet e kujdesit parësor shëndetësor, departamentet e emergjencës, shërbimet specialistike ambulatore, repartet e mjekësisë interne dhe njësitë e triazhit, ekipi vëzhgoi se si pacientët lëvizin nëpër nivelet parësore dhe dytësore të sistemit shëndetësor, nga zbulimi i sëmundjes dhe diagnostikimi deri te trajtimi, referimi, ndjekja dhe kujdesi afatgjatë.

Konsultimet u fokusuan në identifikimin e mundësive për të forcuar koordinimin ndërmjet niveleve dhe për të përmirësuar vazhdimësinë e kujdesit për pacientët që jetojnë me sëmundje kronike. Diskutimet me menaxhmentin e spitaleve dhe kujdesit parësor shëndetësor, si dhe me ekipet e mjekëve dhe infermierëve, shqyrtuan gjithashtu prioritetet institucionale dhe nevojat për mbështetje në të ardhmen.

Vizitat në lokacionet e partnerëve përbëjnë një pjesë të rëndësishme të përpjekjeve të vazhdueshme të Projektit IHS për të forcuar kujdesin e integruar dhe të përqendruar te pacienti, si dhe për të mbështetur përmirësimin e mëtejshëm të shërbimeve për sëmundjet jongjitëse në Kosovë.